LAOAG CITY – Inbatad ni Mrs. Cherry Joy Garma, Information officer ti DepEd-Ilocos Norte a 90 percent a nakasaganan dagiti pagadalan para iti panaglukat ti School Year 2022-2023 intono Lunes, Agosto 22.
Segun kenni Garma, umaboten iti 84,350 wenno 88 a porsiento ti naka-enroll nga estudyante sipud nangrugi idi Hulyo 25.
Naamoan nga iti napalabas nga School Year ket umabot iti 95,586 ti nag-enroll iti pampubliko ken pribado a pagadalan.
Gutgutiguten met ni Garma dagiti nagannak wenno guardians nga i-enroll dagiti annak da ken saanen nga urayen iti maudi nga aldaw.
Inlawlawag na nga agpatingga laeng iti Agosto 22 ti enrolment ken daytoy ket pagalagadan a rumbeng a masurot.
Mainaig iti daytoy, addan ti koordinasyon ti DepEd iti nagduduma a lokal a gobierno pakairamanan ti Rural Health Unit (RHU) para met iti miminum health protocol.
Kabayatanna, inlawlawag ni Garma a basar iti guidelines manipud iti Central Office ti DepEd, dagiti estudyante a makitaan ti sintomas iti covid-19 wenno nangato a temperatura apaman a sumrek ken mapagawid dagitoy ken saan da a sumsumrek iti sumagmamano nga aldaw ken maited laengen ti modules.
Dinakamat na a dagiti nagannak ket masapol nga ipakammo na iti mangisursuro ti estado ti estudyante ken maikoordenar iti RHU.
Innayon ni Garma a no man maimpektaran ti estudyante ket awan ti liability ti DepEd, nangruna ket saan met nga ammo ti napnapanan ti ubing sakbay a sumrek iti pagadalan.
