LAOAG CITY – Inpakaammo ni Dr. Arlene Ragasa, Chief of Hospital ti Gov. Roque B. Ablan Sr. Memorial Hospital a 90 a porsiento a mabaliwan ti nasao nga ospital gapu ta masapul a mapabaro daytoyen.
Inbatadna nga addan ti 80 a tawenen ti maibilang a provincial hospital isu a kasapulan ti naan-anay a pannakapapintas ken pannakapasayaat kadagiti nagduduma a pasilidad iti ospital.
Inlawlawagna a nakikoordinarda iti National Historical Commission of the Philippines iti tulong ti Provincial Government of Ilocos Norte no sadinno nga addan ti pammalubosda kadakuada.
Innayonna nga adda ti manamnama a maipasdek a Medical Arts Building a pundoan ti Department of Health.
Kabayatanna, naammoan nga apaman a maiplastar ti mausar a pundo ket mangrugi ti pannakaipatakder daytoy babaen ti Department of Public Works and Highways.
