LAOAG CITY – Umabot iti 901 nga ektarya ti mamulaan iti pagay,babaen iti Contract Farming Program ti National Irrigation Administration.
Segun ken ni Engr. Rommel Batuac, chief operation iti National Irrigation Administration (NIA), ti programa ket addaan ti 2-billion pesos a pondo a nagbibingayan iti intero a pagillian iti babaen ti General Appropriation Act (GAA).
Ti Contract Farming Program ditoy probinsya ket manipud iti Bonga Pump 1, 2, 3, ken Madongan River Irrigation System.
Inlawlawag ni Engr. Batuac a ti programa ket addaan ti lima a cropping period iti kada dua a tawen, no sadinno a nanayonan daytoy manipod iti dati a 4 crops iti kada dua tawen.
Innayonna a saan nga agbalin a problema dagiti mannalon ti panagbilag, gapu ta apaman a maka-apit da ket ti alaen latta ti National Irrigation Administration dagiti apit da uray no saan pay a namagaan.
Inbatadna a no maipapan met iti presio ket nakadepende iti kontrata, no sadinno a kunana ket mabalin a mangitedda ti 50,000 pesos kas production costs, bayat ti panaga-apit ti lima a tonelada nga apit ket katukad ti 50,000 ngem no nabagyo ket mangited pay ti ahensya ti 20,000 nga insentibo.
Kunana a saan a singiren ti National Irrigation Administration ti production costs uray pay nalugi ti mannalon.
Iti agdama ket napintas ti panagannayas ti implementasyon ti programa gapu ta maipangato ti productivity ken croping intensity dagiti mannalon, ken makatulong da pay iti rice sufficiency ditoy probinsya ken iti intero a pagilian.
Kabyatanna, nangrugin idi Mayo a nagra-ep dagiti mannalon.
