LAOAG CITY – Maipaayan ti pammigbig dagiti honest tricycle drivers ditoy siudad ti Laoag babaen iti resolusion ti Committee on Transporation a naipasa iti Sangguniang Panglunsod.
Daytoy a resolusion ket tapno bigbigen ti kinapudno dagiti tricycle drivers ditoy siudad a saan a nagpangadua a mangisubli dagiti banag a nalipatan dagiti pasaheroda iti luganda kas ti wallet, selpon, kuarta ken dadduma pay.
Segun iti Chairman ti Committee on Transportation, naala amin a nagan dagiti honest tricycle drivers ditoy siudad a nangisubli kadagiti nagduduma a ramit dagiti nagbalin a pasaheroda.
Inbatadna nga idi tawen 2024 ket adu dagiti tricycle driver ti nangipaneknek nga iti baet ti kinarigat iti panagbiag ket saan a nagbalin a tubeng kadakuada tapno dagus nga isubli dagiti nabati a banag iti luganda.
Inlawlawagna a dagiti laeng honest tricycle drivers ditoy siudad ti Laoag ti maipaayan ti pammigbig kas kasukat ti kinapudnona kadagiti pasaheroda.
Innayonna nga adda ti pakabuklan a 92 nga honest tricycle drivers ti maipaayan ti pammigbig apaman a maaprobaran ti resolusion a naipasa iti Sangguniang Panglunsod.
