LAOAG CITY – Umabot iti 94 a tattao ti natay kalpasan a bimtak ti fuel tanker iti northern Nigeria.
Basar iti report, immuna a nagbaliktad ti fuel tanker rason a nagdardaras dagiti naruay a tattao tapno mapan da tayaen dagiti langis a nagubo.
Nupay kasta, bigla lattan a bimtak ti fuel tanker a nangitunda ti pannakatay ti agarop 100 nga indibidual.
Malaksid kadagiti natay ket adda pay ti 70 a sabsabali dagiti nasugatan iti insidente ken naitaray dagitoy iti ospital iti asideg ti Ringim iti Jigawa state.
Possible a manayunan pay ti bilang dagiti natay gapu ta kaadoan kadagiti nasugatan ket kritikal ti kondisyon da.
Mainaig iti daytoy, nagballaag dagiti otoridad kadagiti tattao a saan nga asitgan ti tanker kalpasan ti insidente.
Naamoa a ti fuel tanker ket aggapo iti Kano ken agturong koma iti Nguru ti Yobe state idi napukawan ti kontrol ti driver a nangitunda iti nasao a pasamak.
Saan a naan-ano ti driver ken iti agdama ket nagtalinaed iti kustodyar ti pulisya kabayatan ti maisaysayangkat nga imbestigasyon.
