LAOAG CITY – Inpetteng ni Mr. Tony Pugyao, lider iti Alyansa ng mga Magsasaka ditoy Ilocos Norte a saan a pudno a lumaka ti presyo ti bagas ditoy pagilyan no permaan ni Presidente Rodrigo Duterte ti Rice Tariffication Bill.
Inlawlawag na a no mapagbalin daytoy naan-anay a linteg ket unlimited ton ti mabalin nga angkaten a bagas manipod iti sabali a pagilyan.
Segun kenkuana, no aglayos ti bagas manipod iti sabali a pagilyan ket dakkel ti posibilidad na nga awan ton ti pagilakoan dagiti mannalon kadagiti maapit da nga irik.
Kuna na dakkel ti epekto na daytoy kadagiti mannalon gapu ta isu laeng ti pamastrekan ken pangalaan da ti agserbi kadakuada ti paglakoan da ti irik.
Inpalgak pay ni Pugyao a no mapagbalin a naan-anay a linteg ti Tariffication Bill ket mapukawan to payen ti bileg ti NFA nga agmonitor kadagiti aglaklako ti bagas.
Innayon na a saan to pulos a lumaka ti presyo ti bagas gapu ta tengngel dagiti dadakkel a negosyante dagiti bagas nga aggapo iti sabali a pagilyan.
Mamati ni Pugyao a ti pannakapagbalin a linteg ti Tariffication Bill ket diktal dagiti imperialista ken dadakkel a negosyante iti sabali a pagilyan.
