LAOAG CITY – Immabot ti 358 a pidaso ti kayo ti nakumpiskar dagiti kameng ti PNP Piddig kalpasan a nasita ti elf truck a nakaikargaan na dagitoy iti Brgy. 1 Cabaruan iti nasao nga ili.
Daytoy ti kinumpirmaran ni Police Chief Master Sgt. Prospero Tabangcura Jr., deputy chief of police ti PNP Piddig.
Kuna na a 288 a pidaso dagiti nagduduma a klase ti kasyo idinto a 72 a pidaso ti balingat.
Inbatad ni Tabangcura nga awan ti naipakita da a permit iti panangibiyahe da dagiti kayo ken panagpukan ti kayo.
Innayon na a maaramat dagiti napukan a kayo para ti scaffolding iti Barangay Lapaz ditoy siudad ti Laoag babaen ti nagorder kadagiti kayo.
Maisagsaganan ti maipila a reklamo kontra kadagiti lima a tattao a natiliw gapu ti panagsalungasing da iti PD 705 wenno iligal a panagibiyahe kadagiti kayo.
Immunan a natiliw dagiti lima iti nasao a barangay kalpasan a nakaawat da ti impormasyon iti panagilugan da ti kayo iti Brgy Maruaya iti nasao nga ili.
