LAOAG CITY – Maag-agasan ti maysa a lalaki kalpasan a nabakal ti barukong na babaen kadagiti suspek iti Brgy. 16 iti ili ti San Nicolas.
Segun kenni Police Major Paul Benedict Parado, hepe ti PNP San Nicolas, maipagarup nga adda ti natukkol iti paragpag ti biktima a ni Alvin Bernabe, maysa a tricycle driver.
Immuna iti daytoy, naginom da Edimar Paraluman Tugade, kenni John Christopher Luz, agpada a residente iti Brgy. Bungro iti ili ti Pinili, iti Brgy. 16 San Nicolas.
Iti pannakiiuman ti PNP kadagiti dua a babbai nga agpapaay iti pagiinoman iti nasao a barangay, kuna ni Parado a dimteng ti tricycle a nangsundo kadakuada tapno agawiddan.
Inbatad na a nakurang ti pagbayad dagiti dua a suspek kadagiti ininom da idinto nga inlibas met nga innala dagiti dua a babbai dagiti cellphone da.
Inlawlawag ni Parado nga idi nagbalaw dagiti dua a suspek nga awan dagiti cellphone da ket nagatapan da dagiti dua a babbai.
Gapu iti daytoy, kinamat dagiti dua a suspek ti tricycle a nagluganan dagiti dua a babbai ken idi nakaovertake da ket binakal da ti tricycle a nakatamaan ni Bernabe.
