LAOAG CITY – Nailockdown ti sibubukel a sitio Diriki iti Barangay Davila iti ili ti Pasuquin kalpasan nga adda ti lima a residente a nagpositibo ti covid-19.
Daytoy ti inpakaammo ni Barangay Chairman Elviro Agoo iti Barangay Davila iti ili ti Pasuquin.
Inbaga ni Agoo nga agpaot iti 14 nga aldaw ti lockdown ken mangnamnam nga awanen dagiti agpositibo pay kadagiti dimmalan ti swab test a nakapulapol dagiti nagpositibo ti virus iti nasao a lugar.
Segun ken ni Kapitan Agoo, umabot iti 235 a pamilya ti apektado iti lockdown no sadinno a mapawilan pay a mapan agkalap dagiti residente iti nadakamat a sitio.
Innayon na a makaammo dagiti opisyal ti barangay ti mapan agala iti kasapulan dagiti residente nga apektado iti lockdown.
Ti Sitio Diriki iti Barangay Davila iti ili ti Pasuquin ti pakasarakan kadagiti restaurant, pagtunoan kadagiti nagduduma a lames wenno ikan ken pakagatangan kadagiti agkakaimas nga ikan.
Inbatad ni Agoo a dagiti nagpositibo ti covid-19 iti nasao a sitio ket agkakabbalay.
