LAOAG CITY – Naibunongen iti umuna a bansada dagiti salon owners ken employees ti livelihood assistance a “PAY OUT NOW, WORK LATER” no sadinno a saglilima ribo a pisos dagiti 79 a benipisyaryo ditoy siudad ti Laoag.
Segun kenni Ms. Zara Rasco, admin staff ti Ilocos Norte Trade and Investment Promotion Center (INVEST OFFICE), ti umuna a batch a nabunungan ket dagiti salon owners wenno employees nga addaan ti Certificate of Recognition wenno COR nga mangipaneknek a dagitoy ket addaan ti nasurok a 10 nga empleado, business permit, ken health certificate dagiti empleado na.
Inlawlawag na a dagiti agtagikua ti salon ti mismo a nangisumitir ti listaan iti INVEST OFFICE karaman dagiti requirements.
Inpakaammo ni Rasco a ti prayoridad ti Tourism Office ket dagiti tourism establishments ken dagiti empleado da idinto a ti met prayoridad ti INVEST Office ket salon owners ken empleado da a kangrunaan a naapektaran ti pandemya a gubuay ti covid-19 virus.
Inlawlawag na a dua ribo ti target da nga ipaayan ti livelihood assistance nu sadinno a karaman ti freelancers ken computer shops .
Innayunna pay a gapo ta limitado pay laeng ti garaw dagiti tattao ita a panawen ti pandemiya ket isudan a mismo ti dumanon kadagiti ili ken ciudad tapno agpaperma ti Memorandum of Agreement (MOA) ken agibunong ti livelihood assistance.
Ti “pay out now work later” a livelihood assistance ket maysa a return service ti gobyerno probinsyal no sadinno a nu masapol danto ti serbisyo dagiti benepisyaryo kas iti libre a panagpukis ken dadduma pay, ket paayaban danto dagitoy tapno pagserbian da ti naited kadakuada a lima ribo a pisos.
