LAOAG CITY – Ibilang ni Fire Senior Insp. Michael Escaño, operation officer ti Bureau of Fire Protection (BFP) Region 1 a balligi ti kampanya kontra iti insidente iti uram ditoy rehiyon.
Daytoy ket iti laksid ti apagamapan a panagngato ti insidente ti structural fire no sadinno a manipud 96 iti ummuna a quarter ti 2021 ket nairekord ti 100 nga insidente ita a tawen 2022.
Segun kenni Escaño, iti laksid daytoy ket dakkel ti nagbabaen ti balor dagiti nadadael iti uram nga umabot iti 63.84% wenno nasurok 23 a milyon a pisos ita a tawen no ikumpara iti nasurok 65 milyon iti napalabas a tawen.
Kunana nga iti met biang ti non-structural fire incident, bimmaba iti 14 a porsiento ti nairekord no sadinno a manipud 61 iti nadakamat a quarter idi 2021 ket naimaldit laeng ti 52 nga insidente.
Inpetteng na a dakkel nga accomplishment daytoy iti biang ti BFP-Region 1, ken awan met ti arson case wenno nairanta a panagpuor.
Mainaig iti daytoy, kuna ni Escaño a ti kangrunaan a rason ti napaspasamak nga uram ket iti panaguor kadagiti pagbasuraan, sumaruno ti electrical ken ti open flame and unattended cooking wenno nabaybay-an a malutluto.
Kabayatanna, inlawlawag na nga adda met ti programa ti BFP karaman ti panangiyuswat da ti Fire Safety Seminars and lecture a paset ti Oplan Ligatas na Pamayanan iti intero a pagilyan tapno maipakammo iti publiko no anya ti rumbeng nga aramiden da tapno maliklikan ti insidente ti uram.
