LAOAG CITY – Inbatad ni Mayor Michael Marcos Keon a saan na a ninamnama a mangabak manen iti kaliplippas nga Election 2022.
Kageddan iti daytoy ti panagyaman na iti naipaay kenkuana a suporta manipud kadagiti residente ditoy ciudad ti Laoag.
Segun kenni Keon, itultuloy na ti Baro A Laoag ken iti panagkakadua na iti baro a Sang. Panlungsod nangruna ket ado ti rumbeng nga aramiden da para kadagiti tattao.
Inlawlawag na a nasken a makita ti agdama a miembro ti Sang. Panlungsod ti kinapateg ti pannaka-aprubar ti pondo ti ciudad ken saanen nga urayen a ti baro a konseho ti mangaprubar iti daytoy.
Inadmitir ni Keon a saan na met a ninamnama ti nagbalin a laban da kenni dati a mayor Chevylle Fariñas kageddan iti panangkablaaw na kenni Vice Mayor-elect Carlos Fariñas.
Kabayatanna, kuna ni Keon nga iti laksid ti napasamak wenno ti saan nga isuna ti kandidato ti team Marcos ket napalaos ti ragsak na iti resulta ti laban ni dati a Senador Bongbong Marcos.
Kinablaawan na pay ti kasinsin na iti nalawag a panangabak na iti eleksyon.
Inpalgak na nga ammo na a ti kalikagom ti uliteg na a ni dati Presidente Ferdinand Marcos ket suportaran na ti anak daytoy a ni Marcos Jr. nga isu met ti inaramid na.
Patien na nga itultuloy ni Marcos Jr. dagiti napipintas a naaramidan ti ama na.
