LAOAG CITY – Masapol a maadal a naimbag ti pannakaipangato ti sweldo dagiti mangmangged.
Daytoy ti inbatad ni Mr. Orlino Mandac, maysa nga Economist ken Head ti Department of Economics iti Mariano Marcos State University (MMSU) iti ciudad ti Batac.
Segun kenni Mandac, nasken nga agpada a saan a maabakan ti negosyante ken empleado no diket win-win solution ti maipatungpal.
Iti biang met dagiti babassit a negosyante, kuna ni Mandac a masapol a kitaen ti maseknan nga ahensya ti kasasaad dagitoy nangruna ket agrekrekobre pay laeng ti ekonomiya.
Inlawlawag na a no mapilit met dagitoy kas kadagiti MSMEs a mangipatungpal ti panagngato ti sweldo ket amangan no mapilitan da nga agikkat iti trabahador wenno agsardeng nga agnegosyo.
Gapo iti daytoy, kunana a nasken a maadal a naimbag amin dagitoy tapno agpada a saan a marigatan dagiti mangmangged ken ti mismo nga employer.
Inpetteng na a saan met nga agpapada ti mapaspastrek dagiti nagduduma a negosyo ken mabalin met a ti opsyon ket adda laeng ti pakaipatungpalan na ti panagngato ti sweldo a kas kadagiti minilyon ti income na iti binulan.
Mainaig iti daytoy, kuna ni Mandac a kadagiti dadakkel ti mapaspastrek na ket boluntaryo kuma lattan nga agited ti nayon a sweldo kadagiti empleado da.
