LAOAG CITY – Nagpalagip ni Atty. Julius Balbas, election officer ditoy ciudad ti Laoag kadagiti saan pay a nakarehistro nga agturongen kadagiti comelec offices para iti panagrehistro da.
Segun kenni Balbas, ita nga aldaw ket ado met dagiti napan nagparehistro kangrunaan na kadagiti agtutubo.
Iti kaudian a datos, adda ti 1,321 a nagparehistro ditoy ciudad ti Laoag ken kaadoan kadagityo ket dagiti SK.
Naamoan a dagiti agtawen ti 15-17 ket umabot iti 435 a nagparehistro; dagiti agtawen ti 18 agingga iti 30 a first time voters ket 200.
Karaman pay kadagiti transaksyon da iti comelec ket dagiti nagtransfer iti sabali a barangay ken manipud iti sabali nga ili.
Kabayatanna, inpakammo ni Balbas a saanen a maiyalud-od ti panagparehistro ngem mabalin nga agpatingga da iti alas-singko no makita da nga ado pay laeng ti nakapila.
