LAOAG CITY – Inbatad ni INEC Board President Enrico “Cocoy” Ruiz a welcome development ti pannakaiparuk-at ti warrant of arrest kontra kenni dati a Mayor Marynette Gamboa iti ili ti Dingras.
Ni Gamboa ti maitudtudo a mastermind iti pannakapapatay ti ama ni Ruiz a ni dati nga INEC Board President LorenzoRey Ruiz.
Nupay kasta, kunana a kalpasan ti pannakaiparuk-at ti warrant of arrest kontra kenni Gamboa ket adda met ti naawat na a pangta iti biag.
Segun kenni Ruiz, tunggal adda rumuar a warrant of arrest ket sumaruno met ti pannakaipangta iti biag na isut gapo na a doble ti panagannad na.
Ummuna iti daytoy, naiparuk-at manen ti warrant of arrest kontra kenni Gamboa idi 2019 ken natiliw idiay Quezon City ken naipakustudiyar iti BJMP iti ciudad ti Batac ngem nakarwar, gapo ta adda ti apela na iti Office of the President.
Inlawlawag na a kalpasan ti tallo a tawen, na-deny ti apela ni Gamboa iti Office of the President ken simmaruno ti pannakaiparuk-at manen ti warrant of arrest kontra iti dati a mayor.
Mangnamnama ni Ruiz nga iti kabiitan a panawen ket matiliw ni Gamboa tapno adda ti paggarawan ti kaso ti ama na.
Dinakamat na pay no matiliw ni Gamboa ken maikkan pay ti tsansa a mangipresentar ti kabibiangan na no saan nga isuna ti mastermind, ken tapno malpasen ti kaso ti ama na kalpasan ti 13 a tawen.
Kinumpirmaran pay ni Ruiz a dua kadagiti akusado pay iti pannakapapatay ti ama na ket pimmusayen ken ti maysa a nakabalod ken kalikagom na ti agbalin nga state witness iti daytoy a kaso.
