LAOAG CITY – Naminpinsan a nadadael ti naaramid a detour iti paset ti Barangay Nagrebcan iti ili ti San Nicolas gapu iti napigsa a tudo a gubuay ti bagyo Florita.
Daytoy ti inpakaammo ni Barangay Chairman Joel Aliga iti nadakamat a barangay.
Segun iti kapitan, awan pulos ti sabali a mabalin a pagnaan dagiti sumrek ken rumuwar iti asideg ti barangay da.
Kuna na a no kasapulan a rumuar da iti barangay da ket kapilitan a mapanda manglikaw iti Barangay Sta. Rosa iti ili ti Sarrat.
Innayon na nga inpakaammo da a dagus ti pannakadadael ti detour iti barangay da iti Municipal Disaster Risk Reduction and Management Office (MDRRMO) iti ili ti San Nicolas ken dagiti inhinyero iti kapitolyo probinsyal nga iti agdama ket kadwa da dagitoy nga agmonmonitor iti nasao a lugar.
