LAOAG CITY – Agtultuloy ti panagawat ti Buttong Integrated School kadagiti mayat a mapan agenrol a para Grade 7.
Daytoy ti inpakaammo ni Dr. Paulo Tunac, ti Principal 1 iti Buttong Integrated School ditoy ciudad ti Laoag.
Inbatad ni Tunac nga iti agdama ket umaboten iti 31 dagiti nagenrol a Grade 7 isut gapuna a pinagbalin nan a dua a section.
Innayonna nga adda met dagiti estudyante da a naggapo pay idiay Davao, Samar, Zamboanga ken dadduma pay.
Kabayatanna, inpakaammo ni Tunac nga agingga idi kalman ket umaboten iti nasurok nga 643 nga ubbing ti nagaenrol iti nasao a pagadalan.
Maragsakan ni Tunac gapu ta awan dagiti dadakkel ken nadagsen a problema a napasaran da iti panagsublin iti pagadalan dagiti agad-adal iti Buttong Integrated School.
Iti sabali a bangir, inlawlawag ni Tunac nga inyimplementar dan ti in-person classes manipod lunes agingga iti biernes kalpasan a natingiting a kabaelanen ti pagadalan nga isubli ti normal a panagklase kas idi awan pay ti pandemya.
