LAOAG CITY – Manamnama a maiyuswat ti public hearing mainaig ti plete iti tricycle iti siudad ti Batac intuno Sabado.
Inbatad ni Vice Mayor Windell Chua iti nasao a siudad, dua a grupo ti immunan a nagpetisyon ti dua a grupo dagiti traysikelan a maipangato ti plete.
Gapu iti daytoy, kuna na a nasken a matratar ti nasao a petisyon kageddan ti panagngato ti presyo ti krudo.
Kuna ni Chua a nu maitantan ket amangan nga isu ti agbalin a problema iti nagbaetan dagiti agpaspasada ken commuters.
Innayun na nga itan ti panawen a masukatan ti maipatpatungpal a plete iti siudad agsipod ta tawen 2018 pay laeng idi naudi a nasukatan daytoy.
Naamoan nga iti agdama ket 14 a pisos ti plete iti siudad ti Batac manipod iti dati a 9 a pisos a naudi a naipatungpal idi tawen 2018.
