LAOAG CITY – Nagyaman ni Barangay Chairman Rodolfo Ramirez iti Barangay Salet-Bulangon ditoy ciudad ti Laoag iti panangaksyon a dagus ti sang panglungsod iti reklamo da kontra iti management ti UNITOP.
Daytoy ket kalpasan a saan pay nga inleppas ti nasao a kompanya ti retaining walls iti kalsada tapno saan nga agreggaay ti daga.
Inlawlawag ni Kapitan Ramirez nga apaman a naidanun ti anak na ti problema da ken ni Vice Mayor Rey Carlos Fariñas ket nagaramid a dagus ti konseho ti resolusyon para iti panangirekomendar da ken ni Mayor Michael Marcos-Keon ti pannakasuspenso ti business permit ti nasao a kompanya.
Inpalgak ni Ramirez a saanna koma a kayat nga agtungpal iti kastoy ngem awan ti maaramidan da gapu ta isuda a bumarangay ti kangrunaan a maapektaran iti saan a panangikabil ti kompanya iti retaining walls iti kalsada a sakop ti barangay da.
Immunan nga inbatad ti bise mayor a masdaaw no apay nga inikkan ti City Engineering Office ti permi nga agoperaren ti mall nga inpatakder ti nasao a kompanya idinto nga ado pay dagiti lapses na.
Mainaig iti daytoy, inpakaammo ti bise mayor a nakasarita na metten ni Mayor Keon maipapan iti daytoy a banag.
Kuna na nga inkari ti mayor a kitaen na ti nasao a problema iti nadakamat a barangay.
Innayon ni Fariñas a makaammon ti mayor a mangdesisyon iti rekomendasyon da.
