LAOAG CITY – Agprobproblema ti Provincial Veterinary Office iti umad-adu a bilang dagiti agpospositibo ti rabies ditoy Ilocos Norte.
Segun ken ni Provincial Veterinarian Dr. Loida Valenzuela, kaaddoan kadagiti sample nga ipatpatulodda idiay Sta. Barbara, Pangasinan ti agpospositibo.
Inpalgakna nga iti agdama ket umaboten iti nasursurok ngem tallopulo a barangay ditoy probinsia ti addaan ti nagpositibo ti rabies ken kaaddoan iti Siudad ti Batac.
Mainaig iti daytoy, nagpanawagan ti Provincial Veterinarian kadagiti addaan ti taraken nga aso a mangigalut kadagiti taraken dagitoy tapno saanda a makaadayo.
Inbunannagna a no adda dagiti gangannaet nga aso nga agkagat kadagiti padana nga aso, maysa daytoy kadagiti pagilasinan a dagitoy ket maipagarup nga adda ti rabies-na.
Inbatadna a masapul ti pannakikammayet ti komunidad iti pannakapaksiat ti rabies a kas met laeng iti pannakapaksiat ti African Swine Fever.
Inlawlawagna nga addan ti lima a naipakaammo iti opisinada a maipagarup a natay gapu iti rabies.
Kunana a dua kadagitoy ti naipadanonen ti opisinada iti Provincial Health Office, dua ti mannarimaan a maim-imbestigar a pakaibilangan ti maysa iti ili ti Sarrat ken maysa ti Paoay ken ti kaudian nga inpormasyon a naipakaammo kadakuada ket maysa a taga siudad ti Batac.
Mainaig iti daytoy, binallaagan ni Valenzuela dagiti kakailian nga agan-annad tapno maliklikan ti makagat kadagiti taraken nga addaan ti rabies nangnangruna iti aso.
