LAOAG CITY – Natiliw ti maysa nga army reservist a suspek iti pammaltog iti merkado publiko, bisinidad ti Barangay Lydia iti ili ti Marcos.
Ti suspek ket agtawen ti 50, mannalon idinto a ti biktima ket agtawen ti 42, naasawaan, driver ken residente iti Barangay Lydia iti nasao met laeng nga ili.
Segun kenni Police Major Jonevale Maramag, ti chief of police ti Philippine National Police iti ili ti Marcos a basar iti imbestigasyon da ket napan nagdeliver ti biktima iti merkado publiko ken inparking na ti nagluganan na a closed van iti sangwanan ti tiendaan.
Inbatad na a ditoy metten a simmangpet ti suspek ken inasot na ti paltog na rason a nagtaray ti biktima iti likod ti lugan na ken pinaltogan na daytoy ngem saan a natamaan.
Naamoan a bayat nga umadayo ti biktima ket pinaltogan manen ti suspek daytoy ngem saan latta a natamaan agingga a dagus a naglibas ti suspek.
Narekobre iti nakapasamakan ti insidente ti dua nga kapsula ti kalibre 45 a paltog.
Gapo iti daytoy, naiyuswat ti hot pursuit peration dagiti kameng ti pulisya iti nasao nga ili agingga a natiliw met laeng ti suspek iti Barangay Ferdinand partikular iti asideg ti piskarya na.
Nakumpiskar iti suspek ti maysa a kalibre 45 a paltog nga addaan ti magazine ken loaded ti uppat a bala ken ti motorsiklo na a nausar.
Inlawlawag ni Maramag nga agam-ammo met laeng ti suspek ken ti biktima.
Mainaig iti daytoy, kuna ti hepe a dua nga anggulo ti kitkitaen da a motibo iti pammaltog kas iti love triangle ken old grudge wenno datin a susik.
Kabayatanna, inbatad ni Maramag a basar iti palawag ti suspek, napan nakitienda ken idi rumuaren ket nasabat na ti biktima ken maipagarop a bakalen na daytoy ti bato rason nga inasot na ti paltog na.
Dinakamat na nga inpetteng ti suspek a ti laeng paltogan na kuma ket ti saka ti biktima ngem saan a natamaan.
Iti agdama, maisagsaganan ti kaso a panaglabsing iti Republic Act 10591 ken Attempted Murder kontra iti suspek.
