LAOAG CITY – Naiget ti kalikagum ni Gob. Matthew Marcos Manotoc a maidalus ti titulo dagiti lote a kukua ti gobierno probinsial ti Ilocos Norte.
Segun ken ni Engr. Herminio Castillo, provincial assessor, naiget ti pammilin ti gobernador iti panagkammayetda ken ni Provincial Legal Officer Atty. Erme Labayog a mangasikaso iti daytoy a banag. Mainaig iti daytoy, siraragsak a nangipakaammo a nalpasdan a naidalus ti titulo ti lote a nakapatakderan ti kapitolio probinsial.
Inbunannagna a sumarsaruno dagiti dadduma pay a lote a kukua ti gobierno probinsial.
Inlawlawagna a ti lote a nakaipatakderan ti Gov. Roque B. Ablan Sr. Mem. Hospital ket mannarimaan pay laeng ti negosasyonna idinto a naipilan ti Provincial Legal Office ti “judicial titling” iti lote a nakapatakderan ti Marcos Hall of Justice.
Kabayatanna, inbatad ni Castillo a ti lote ti probinsia a masarakan iti Barangay dos ti siudad ti Laoag ket mannarimaan pay laeng ti panagalada kadagiti requirements a paisubsubmitir ti Department of Environmment and Natural Resources idinto a dagiti lote ti probinsia idiay Burgos ken Badoc ket mannarimaan pay laeng ti pannakaiproseso ti Bureau of Internal Revenue-na.
Kunana nga adu pay daytoy a proseso gapu ta kalpasan daytoy ket maipan iti registry of deeds ken maipanagan iti Provincial Government of Ilocos Norte.
Nupay kasta, inpanamnamana nga awan sarday ti pannakikammayet ti opisinada iti Provincial Legal Office tapno maidalus a nasayaat ti titulo dagiti lote ti probinsia a kas iti naiget a kalikagum ni Gob. Manotoc.
