LAOAG CITY – Indeklarar ni King Mohammed VI ti tallo nga aldaw a panagladladingit iti Morocco kalpasan ti idadayyeg ti magnitude 6.8 a gingined no sadinno nga addan ti agarop 2 ribo a tattao ti kumpirmado a natay.
Inbilin ni King Mohammed VI ti pannakaipaay ti naan-anay a tulong para kadagiti nakalasat iti didigra kangrunaan na ti pagnaedan ken kanen da.
Basar iti report, nagtalinaed dagiti naruay a tattao iti ruwar gapu ta dagiti dadduma ket naminpinsan a nadadael ti balay da idinto nga adda dagiti mabuteng nga agsubli iti pagtaengan da gapu iti panagamak dagitoy a maulit ti napigsa a panagdayyeg.
Mainaig iti daytoy, nagpaawag a dagus ni King Mohammed VI ti emergency meeting kadagiti opisyales ti Morocco para iti maiyuswat a rescue efforts ken aid.
Kas paset ti panagladladingit iti Morocco ket naikabil iti half-mast kadagiti amin a public buildings iti intero a pagilyan iti uneg ti tallo nga aldaw.
Kabayatanna, inpakaammo ti interior ministry a ti Al Haouz province ti kaadoan ti pimmusay, sumaruno iti Taroudant province idinto a dagiti dadduma ket manipod iti Marrakesh.
Minandar payen ti ari dagiti kameng ti armada nga asistiran da ti rescue teams, ken dagiti Moroccans ket agdonar ti dara kas paset ti national effort tapno matulungan dagiti biktima.
Nakasagana metten ti United Nations a tumulong iti gobierno ti Morocco para iti rescue efforts.
Uray dagiti dadduma a pagilyan kas iti Spain, France ken Israel ket nagkari a tumulong para iti Morocco.
