LAOAG CITY – Nagdinnungpar ti motorsiklo ken kurong-kurong iti Barangay 55, Barit ditoy siudad ti Laoag.
Daytoy ti inpakaammo ni Patrolman James Dulay ti Duty Investigator ti Philippine National Police – Laoag Traffic Division.
Segun kenkuana, nabigbig ti driver ti motorsiklo a ni Don Dancel Antonio, agtawen ti 43 ken residente ti Barangay Bagbago iti ili ti Solsona idinto a nabigbig met ti nangiturong ti kurong-kurong a ni Walter Lazaro Dugay, agtawen ti 42 ken residente iti Barangay 38, Sangil iti ili ti Bacarra.
Inbatadna a basar iti insayangkatda nga imbestigasion, kabayatan a dumaldalyasat ti nakamotorsiklo nga agturong nga agpaamianan ket kellaat daytoy a bimmallasiw nga agpadaya a nangitunda ti panagdinnungparda iti kurong-kurong nga agpaabagatan met kadayta a gundaway.
Gapu iti daytoy, kunana nga agpapada a nagsagaba ti dunor iti nagduduma a paset ti bagi ti driver ti motorsiklo pakairamanan ti driver ti kurong-kurong ken ti kaduana a nakalugan.
Inpalgakna a naitaray dagiti maseknan iti Governor Roque B. Ablan Senior Memorial Hospital para iti naan-anay a pannakataming dagitoy.
Iti agdama, naammoan nga addan iti nasayaat a kasasaad dagiti nasao nga indibidual ken manamnama nga agsasangoda apaman a makaruarda iti ospital tapno mapagnunumoan ti pannakasolbar ti insidente.
Kabayatanna, mapatawan ti citation ticket ti driver ti motorsiklo gapu ta naduktalan daytoy a nabartek ken awan ti papeles ti motorsiklona.
