LAOAG CITY – Umaboten iti 39 a rice retailers ti nakaawat ti sag-15 ribo a pisos a tulong pinansyal kadakuada gapu iti pannakaipatungpal ti price cap iti bagas kas naipalaon iti executive order 39 ni Presidente Ferdinand Marcos Jr.
Daytoy ti inbatad ni Mr. Dominador Alberto, ti officer in-charge iti Consumer Protection Division iti Dept. of Trade and Industry (DTI) ditoy probinsya.
Segun ken ni Alberto, manipod iti nasao a bilang ket walo ti naggapo ditoy ciudad ti Laoag, 19 iti ciudad ti Batac ken 12 iti ili ti San Nicolas, no sadinno nga agpapada dagitoy nga aglaklako ti bagas iti merkado publiko.
Inpakaammo ni Alberto nga adda pay ti 144 a manamnama nga umawat ti tulong pinansyal kalpasan a na-validate ken inaprubaran ti Department of Social Welfare and Development.
Innayon na a daytoy ti pagtutulagan da no kaanu ti pannakaiyawat kadagiti maseknan ti tulong pinansyal a para kadakuada.
