LAOAG CITY – Ilunglungalong ti Trade Union Congress of the Philippines a maaddaan ti “Comprehensive Heat Risk Action Plan” dagiti amin a workplace kas precautionary measures para iti pannakaprotehir ti salun-at ken pagsayaatan ti amin a mangmangged.
Daytoy ti panawagan ti nasao a labor group iti baet ti nakaro a kinabara ti panawen a mapaspasaran iti agdama ti pagilian a mabalin a mangitunda ti negatibo nga epekto iti bagi ken salun-at ti maysa a tao.
Iti maysa nga statement ket inpaganetget ti grupo ti Advisory No. 8 series of 2023 nga inparuk-at ti Department of Labor and Employment a mangibilbilin kadagiti amin nga employers a mangiyuswat ti health risk assessment kadagiti empleyado da gapu iti nakaro a kinabara ti panawen kangrunaan na dagiti addaan ti working hours manipod iti oras ti alas-onse ti bigat agingga iti alas-dos ti malem.
Iti babaen ti advisory ket maibilbilin pay kadagiti employers nga ipaayan ti naurnus a ventilation ken danom dagiti trabahador da ken mangipatungpal ti maiyannatop nga adjustments iti rest breaks dagiti mangmangged.
Kabayatanna, malaksid iti daytoy ket maibilbilin pay kadagiti employers a mangiyuswat ti information and education campaigns mainaig iti heat stress ken no kasanu a maliklikan.
