Inpinal ti administrasion ni Biden dagiti pagannurotan a mangkissay iti mangpapeggad iti planet-warming pollution a pinataud dagiti planta ti koriente.
Daytoy ket maysa kadagiti kapatgan a wagas tapno maikkan importansya ti aglawlaw ken malabanan ti climate change.
Dagiti baro a pagannurotan ti Environmental Protection Agency ket mangpilit kadagiti planta ti koriente nga agusar ti natural gas power plants a mangkissay iti agarup 90% iti climate pollution inton tawen 2032, no sadinno a dagiti pagannurotan ket manamnama a mangkissay iti carbon dioxide emissions iti 75% no idilig iti kangatuan a bilangna idi 2005.
Inpakaammo pay ti ahensia dagiti naing-inget a pagannurotan para iti neurotoxin mercury a mairuar manipud kadagiti smokestack-da ken kasapulan ti nataltalged a pannakaibelleng dagiti toxic wastewater ken coal ash, a byproduct ti panagaramid iti koriente.
Kagiddan ti pannakaipakat ti sumagmamano a dadduma pay a kangrunaan a pagannurotan kadagiti napalabas a bulan, dagiti tignay idi napan a Huebes, Abril 24, ket ad-adda a pagilasinan nga ikagkagumaan ni Presidente Joe Biden a patibkeren ti climate legacy na sakbay ti eleksion ti 2024 ken mangibati ti pagmenna-mennaan dagiti agtutubo a sipapanunot seknan iti panangtaripato ti aglawlaw.
Kabayatanna, ti kalabanna a Republikano a ni dati a United States President Donald Trump, ket binusbosna ti kinapresidentena a nangisubli iti nasurok a 100 a pagannurotan para iti aglawlaw , agraman dagiti pagannurotan ti planta ti koriente a pinatibker ni Biden idi Abril 24, 2024.
