LAOAG CITY – Inallukoy ti Philippine Tobacco Growers Association at ng National Federation of Tobacco Farmers Association and Cooperatives ti Kamara a bumukel ti bicameral conference committee tapno talantanen ti mailunglungalong nga Anti-Agricultural Economic Sabotage Act.
Segun ken ni Philippine Tobacco Growers Association president Saturnino Distor a masapol ti gakat ken napateg ti tobacco farming iti food security gapu ta agmulmula met dagiti miembro dagitoy ti pagay, mais ken dadduma pay primary crops.
Inrakurak met ti National Tobacco Administration nga iti agdama ket addaan ti 2.2 milyon a Pilipino a “financially dependent” iti tabako pakairamanan dagiti nasurok nga 430 a ribu a mannalon, farm workers ken dagiti pamiliada.
Inbatad ni National Federation of Tobacco Farmers Association and Cooperatives Chairman Bernard Vicente a saan laeng nga agbalin a napintas a damag para kadagiti mannalon ti panangipasa ti gakat no di ket makaiyasideg pay daytoy iti Marcos administration iti pannakaipatungpal ti campaign promise daytoy a pannakaipaay ti abot-kaya nga agricultural products iti publiko.
Inpasa ti Kamara ti House Bill 9284 wenno am-ammo pay iti Anti-Agri-Fishery Commodities and Tobacco Economic Sabotage Act idi Septiembre 27, 2023.
Kabayatanna, inaprobaran ti Senado ti kapada a gakat, Senate Bill 2432 wenno ti Anti-Agricultural Economic Sabotage Act idi Disiembre 11.
Iti babaen ti gakat, maikonsiderar ti agricultural hoarding nga economic sabotage no ti indibidual wenno dagiti grupo ket agilemlemmeng ti stocks ti agricultural ken fishery products malaksid iti 30 a porsiento ti normal inventory level-da, dua a lawas kalpasan ti pannakaideklara ti abnormal situation, maysa nga emergency wenno state of calamity.
