LAOAG CITY – Mapagam-amkan a rinibo pay a tattao dagiti mapukpukaw kalpasan ti napasamak a landslide iti maysa a baryo idiay Papua New Guinea.
Inbatad ti acting director ti Nation’s National Disaster Centre nga agamak nga adda ti nasurok a 2 ribo a tattao a mapagam-amkan a nagaburan a sibibiag kalpasan iti insidente.
Kuna na a narigat a maestablisar ti eksakto a bilang dagiti casualties gapu ta marigatan dagiti rescuers nga agkali ken awan ti usaren da nga equipment.
Iti agdama ket addan ti sumagmamano a bangkay a narekobre iti lugar.
Maipalagip a napasamak ti panagreggaay ti daga iti kabanbantayan a paset ti probinsya ti Enga a pagnanaedan ti agarop 3,800 a tattao.
Indanun metten ni Prime Minister James Marape ti pannakipagladingit na ken inbilin na iti defence force ken emergency agencies ti panagturong da iti lugar tapno tumulong iti rescue operations.
