LAOAG CITY – Ilunglungalong ni Surigao del Norte Rep. Robert Ace Barbers a biagen manen ti death penalty iti pagilian ken iraman ditoy dagiti dadduma a krimen.
Inaramid daytoy ni Barbers kalpasan ti napasamak a road rage incident iti paset ti Makati-Edsa tunnel a ti biktima ket maysa a family driver.
Segun ken ni Rep. Barbers, maysa a Chinese ti suspek ken ti pagilian ket agbalbalinen a lugar dagiti kriminal, terorista, espiya ken sleeper cell a ti resulta daytoy ket makatkatawaanen ti Pilipinas iti lubong.
Kwinestyunaran ti beterano nga agpanpanday linteg no kasanu a naaddaan ti paltog ti suspek a maysa a Chinese bully ken awan ti aniaman a pinaltugan na ti maysa nga inosente a Pilipino.
Inpalgak ni Barbers a nagbalinen a nagulo ti sistema ti pagilian.
Inyarigna ti panagkunniber manipod iti kababaan a ranggo dagiti empleado a mangpaalisto kadagiti transaksyon para iti maysa a bayad agingga iti nangangato nga opisyal iti gobierno a mangipalubos ken mangipapaay ti bileg kadagiti kriminal rason a maar-aramid da latta ti kayat da nga aramiden.
Inpetteng na a nadadael ti panagkunniber ti moral fiber dagiti Pilipino gapu ta ti pammati dagiti gangannaet ket tunggal Pilipino ket adda ti bukod na a presyo, aniaman ti estado ken posisyon na ket mabalin a pasuksukan.
Gapu iti daytoy, inpaganetget ni Barbes a panawenen tapno biagen manen ti dusa a patay ken iraman ti ad-do pay a krimen a madusa iti kastoy.
Innayon na a no kayat nga isalakan dagiti sumarsaruno nga henerasyon ket kasapulan nga ipakita kadakuada ti umiso a wagas ti panangiwanwan, ken imula iti panunot da a ti kinalukay ken kaawan ti interest ket makaperdi ti panagtalek ken pammati iti gobierno.
Inpalagip pay ni Barbers a napaneknekanen no kasanu a manipularen dagiti kriminal dagiti linteg iti Pilipinas gapu ta ammo da a makalusot da latta babaen ti kwarta ken impluwesya da.
