LAOAG CITY – Inbatad ti Department of Justice nga addan ti 500 a social media account a naipa-take down iti social media giant a Meta a dagitoy ket maikonkonektar iti illegal a panaglako kadagiti maipasngay a maladaga iti online.
Iti baet daytoy nga panangikarkarigatan dagiti otoridad a matiliw dagiti amin nga adda ti pakainaigan na iti ilegal nga online selling kadagiti maladaga kas paset ti kalikagom a naan-anay a maparmek daytoy.
Nupay kasta, inpetteng ni Justice Spokesperson, Asec. Mico Clavano a saan pay nga umdas ti nasao a bilang dagiti Social Media account a naipa-take down.
Mamati ni Clavano nga ado pay dagiti social media account nga agar-aramid iti isu metlaeng nga illegal nga aktibidad.
Innayon na nga iti agdama ket manarimaan ti pannaki-koordinar ti cybercrime division ti Department of Justice iti Palasyo ti Malakanyang, idinto a ti National Bureau of Investigation ken uray ti Inter-agency Council Against Trafficking ket tumultulong metten iti Social media giant a Meta seknan iti nasao a problema.
Kabayatanna, nagpanawagan pay ti ahensya iti Meta nga ad-ado koma pay nga inisyatiba, programa, ken mekanismo ti maaramid tapno masigurado a maprotehiran dagiti agtutubo iti online.
