LAOAG CITY – Rumbeng nga ipannakkel dagiti Pilipino ni Presidente Ferdinand Marcos Jr. iti natibker a mensahena iti maika-21 nga International Institute for Strategic Studies Shangri-La Dialogue iti Singapore, segun ken ni Speaker Ferdinand Martin Romualdez.
Iti panagbitlana, inpetteng ni Presidente Marcos ti inkarina a depensaan ti tunggal pulgada ti teritorio ti Pilipinas manipod iti panangsakup kagiddan ti panangitandudu iti kinapateg ti dayalogo ken diplomasya iti panagresolbar dagiti saan a panagkikinnaawatan.
Pinadayawan ni Speaker Romualdez, lider ti Kamara nga addaan ti sumurok 300 a pannakabagi, ti panagbitla ti Presidente a napateg nangruna ket bumarbara ti tension iti West Philippine Sea gapu kadagiti agresibo a tignay ti China.
Iti panagbitlana ket inpetteng ni Presidente Marcos ti panagtakder ti Pilipinas para iti kinakappia ken rule of law.
Naminsanna pay nga inpetteng ti panangsurot ti Pilipinas iti 1982 United Nations Convention on the Law of the Sea (UNCLOS) ken 2016 Arbitral Award a nangbigbig ti maritime rights ti Pilipinas iti West Philippine Sea.
Dinakamat ni Speaker Romualdez ti takder ti Presidente a depensaan ti tunggal pulgada ken kilometro ti teritorio.
Namin-adun a daras nga inulit ni Romualdez ti naiget a suporta ti Kamara de Representantes iti istratehiko nga inisyatiba ni Presidente Marcos Jr. tapno patibkeren ti kabaelan pay a mangdepensa ti pagilian ken soberanya ti Pilipinas tapno marikan ti tunggal Pilipino ti grasia ti patrimonya.
Iti kallabes ket nangiyuswat ti dua a komite ti Kamara ti panagdengngeg iti Masinloc, Zambales tapno mangngeggan dagiti arungaing dagiti mangalap a naapektaran ti pamastrekan gapu iti agtultuloy nga agresibo a tignay ti Chinese Coast Guard ken maritime militia iti West Philippine Sea.
Kagiddan daytoy ket inbatad met ni Speaker Romualdez nga iti baet ti natured a takder ni Presidente Marcos Jr. ti kinapateg a maaddaan ti dayalogo ken diplomasya iti panagresolbar kadagiti saan a panagkikinnaawatan.
