LAOAG CITY – Kinumpirmaran ti Philippine Army a nakaengkwentro da ti sumagmamano a kameng ti New People’s Army iti Brgy. Poblacion iti ili ti Nueva Era itay bigat.
Nagpaot ti 15 a minutos ti rinnupak iti nagbaetan dagiti tropa ti gobierno ken rebelde a grupo.
Awan metten ti naipaay a dadduma a detalye no adda dagiti nadangran iti napasamak nga engkwentro.
Kabayatanna, inalay-ayan ni Governor Matthew Marcos-Manotoc ti panagamak ti publiko seknan iti napasamak nga engkwentro iti nagbaetan ti Philippine Army ken dagiti rebelde iti ili ti Nueva Era.
Kuna ti gobernador a basar iti impormasyon na ket napan laeng gimmatang dagiti rebelde iti suplay da a taraon iti paset iti ili ti Nueva Era idi napasamak ti engkwentro iti nagbaetan da iti Philippine Army.
Inpasigurado pay ti gobernador nga awan ti pangta ti seguridad ditoy probinsya manipod iti makattigid a grupo a dagitoy ket mapapati a naggapo iti probinsya ti Abra.
