LAOAG CITY – Nangrugin a nailako dagiti maysa a ribu a sako ti National Food Authority (NFA) buffer stocks ti lokal a gobierno ti San Juan City kas paset ti food security emergency for rice nga inrakurak ti Department of Agriculture (DA) iti umuna a lawas ti Pebrero.
Segun ken ni San Juan City Mayor ken Metro Manila Council President Francis Zamora, daytoy pay laeng ti umuna a maysa a ribu a sako nga allocated iti siudadda no sadinno a kada sako ti panaglako iti daytoy a dumanon iti P1,650.00 a magatang ti publiko.
Ti nagbalin a sistema ti San Juan local government unit ket nangiwayatda nga immuna ti pre-registration tallo nga aldaw ti napalabas tapno mailako ti umuna a maysa a ribu a sako daytoy ken nagkiddaw manen ti baro a set para met iti 2nd batch ti panaglako daytoy.
Kabayatanna, para met iti Department of Agriculture, saan nga adayo a maulit manen ti nasao a situasion gapu ta ti palawag ni Agriculture Secretary Francisco Tiu Laurel Jr., posible daytoy agingga a saan pay a naamendar manen ti Rice Tarrification Law.
