LAOAG CITY – Posible a bumagsak iti P80/ iti kada kilo ti retail price ti sibuyas kadagiti merkado kageddan ti panagsangpet ti imported onion manipud idiay China, basar iti Department of Agriculture (DA).
Inbatad ni Department of Agriculture spokesperson Assistant Secretary Arnel De Mesa, posible a mariknan ti naan-anay a panagbaba ti presio dagiti sibuyas iti uneg ti dua a lawas.
Naammoan a manipud iti dati a P180 agingga iti P200 iti kada kilo nga agdama a presio, posible a bumaba daytoyen manipud iti P80 agingga iti P100 iti kada kilo a mayat iti target price range.
Basar iti Bureau of Plant Industry (BPI), ti laeng 459 metric tons (MT) a nalabbaga a sibuyas manipud iti sumurok 3,000 MT nga inangkat ti simmangpet ditoy Pilipinas.
Iti puraw a sibuyas, ti laeng a 200 MT manipud iti sumurok 1,000 MT nga order ti simmangpet.
Inbatad ni De Mesa, in-inoten nga agsubsubli ti suplay ti sibuyas kadagiti tiendaan manipud kadagiti sumangsangpet nga imported pakairamanan ti dakkel a bulto ti local supply kageddan ti panagmula.
