LAOAG CITY – Nasakit ti nakem ti pamilia ti maysa nga ina a natay iti maipagarup a pannakabaybay-a ken kinabayag a pannakaiyakarna iti ambulansia iti Rural Health Unit iti ili ti Nueva Era.
Segun ken ni Mr. CJ Ruiz, anak ti biktima nga adda ti nakasarsaritada a personnel iti Rural Health Unit nga iyurayda laeng ti sungbat ti Mariano Marcos Memorial Hospital and Medical Center para iti pannakaiyakar iti ambulansia ti inana.
Nupay kasta, naduktalanda nga awan pulos iti rekord nga adda ti timmawag a personnel manipud iti Rural Health Unit iti ili ti Nueva Era iti Mariano Marcos Memorial Hospital and Medical Center iti siudad ti Batac.
Inlawlawagna a no maysa laeng koma nga ayab ti Rural Health Unit ket dakkel pay laeng ti tsansana a maisalakan ti biag ti inana.
Mainaig iti daytoy, inpakaammona a bimmisita da Mayor ken Bise Mayor pakairamanan dagiti doktor ken personnel ti Rural Health Unit iti ili ti Nueva Era iti pagtaenganda idi kalman.
Innayonna a dimmawat ti panagpadispensar dagiti doktor ken personnel ti Rural Health Unit iti pamiliada ngem inpettengna a saanda pay a maipaay ti pammakawan kadagitoy a gundaway gapu iti sakit ti nakemda.
Immuna iti daytoy, namin-adu a daras a nagkiddaw ti tulong dagiti miembro ti pamilia iti Rural Health Unit tapno maitaray ti pasiente iti Mariano Marcos Memorial Hospital and Medical Center ngem saanda nga inkaskaso dagitoy.
