LAOAG CITY – Indauloan ni Philippines’ first-ever Olympic champion Hidilyn Diaz ti maisaysayangkat a weightlifting demonstration para iti Palarong Pambansa ditoy siudad ti Laoag.
Segun ken ni Mr. Hipolito Carlos Salva Jr., City Sports and Development Officer, inimbitaranda ni Hidilyn tapno idauloan mismo ti weightlifting demonstration kadagiti atleta ken coach ditoy siudad.
Inbatadna a ti weightlifting demonstration ket agpaot iti uneg ti dua nga aldaw tapno dumalan iti panagsanay dagiti atleta ken coach.
Inlawlawagna nga iti kallabes ket nagturong ni Hidilyn iti Department of Education – Schools Division Office ditoy siudad ti Laoag tapno iyam-ammo ti ay-ayam a weightlifting kadagiti umaayam.
Mainaig iti daytoy, maisayangkat ti Palarong Pambansa ditoy siudad ti Laoag manipud inton Mayo 24 agingga Hunio 2.
Immuna iti daytoy, naragsak ti Tokyo Olympics gold medalist kalpasan a nairaman ti ay-ayam a weightlifting iti Palarong Pambansa.
Kabayatanna, ti Palarong Pambansa ket maibilang a kadakkelan a multi-sport event ditoy Pilipinas a maisaysayangkat iti kada tawen a pakipasetan dagiti student athletes iti intero a pagilian.
