LAOAG CITY – Inbatad ni Police Capt. Kester Arellano, ti chief of police iti ili ti Sarrat nga isagsagana dan ti kaso a theft nga ipila da kontra kadagiti dua a babbai a nagsipdot bayat iti panag-fiesta iti ili ti Sarrat.
Segun ken ni Arellano, dagiti biktima ket agtawen ti 67 ken 65, agpada dagitoy a residente iti ili ti Sarrat idinto a dagiti suspek ket isuda Estrella Basuil y Sinco, agtawen ti 75, naasawaan, awanan ti trabaho, residente iti Brgy. Pug-os, Sinait, Ilocos Sur ken ni Ronalyn Tinasa y Ibatuan, agtawen ti 51, naasawaan ken residente met iti Brgy. Pambaran, iti ili ti Paoay.
Inlawlawag ni Arellano a basar iti imbestigasyon da, inipig-ipig dagiti suspek dagiti biktima ken bulon da metten a rinabsot dagiti kwentasa da.
Kuna ni Arellano a ti balor ti maysa a kwentas ket 35 a ribo a pisos idinto a ti maysa ket 28 ribo a pisos, ken agpada dagitoy a nagatang iti ballasiw taaw.
Inpakaammo ni Arellano nga agpada a binigbig dagiti biktima dagiti suspek nga isuda ti nangipig-ipig kadakuada bayat iti panagrarapok ti tattao a napan naki-fiesta iti ili ti Sarrat.
Innayon na nga adda pay ti maysa a kadwa dagiti suspek ngem nakataray daytoy.
Mainaig iti daytoy, inpakaammo ni Arellano nga iti panangugak da iti bag ni Basuil ket nakita da ti maysa a silver pendant ken maysa a gold pendant idinto nga iti bag ni Tinaza ket nakita met ti agparis nga aritos.
Iti agdama, nagtalinaed dagiti suspek iti Philippine National Police iti ili ti Sarrat bayat a maisagsagana ti kaso a theft a maipila kontra kadakuada.
