LAOAG CITY – Natiliw ti maysa nga ina kalpasan nga inreklamo ti katuganganna gapu ta pinagsawsaw-anna ti dakes a sarita.
Binigbig ni P/Maj. Antonio Marzan, Hepe ti Pinili Municipal Police Station, ti akusado ket agtawen ti 38, residente ti Sitio Central, Barangay Lumban-Bicbica iti nasao nga ili.
Natiliw ti akusado babaen ti bileg ti warrant of arrest nga inparuk-at ni Hon. Ligaya Valdez Sulicipan, Presiding Judge ti Municipal Circuit Trial Court, First Judicial Region, Badoc-Pinili Ilocos Norte.
Ti akusado ket sumangsango ti kaso nga Slight Oral Defamation of the Revised Penal Code ken narekomendaran ti 10 a ribu a pisos para iti temporario a panakawaya-wayana.
Insigida a pinaluspusan ti Philippine National Police iti ili ti Pinili kalpasan a nakapagpiyansa para iti temporario a pannakawaya-wayana.
Kabayatanna, inbatad ni Marzan a mismo ti katuganganna ti nagreklamo itay napalabas a tawen.
Innayonna nga immunan a nagsarita dagiti dua iti uneg ti barangay ngem saan daytoy a naurnos rason nga inpilada ti reklamo kontra iti suspek.
