LAOAG CITY – Naduktalan ti Chairman ti Committee on Tourism a ti GPS location ti Sand Dunes ditoy siudad ti Laoag a sabali a lokasion ti agparang no i-search daytoy dagiti turista nga agturturong ditoy siudad.
Segun kenkuana, masapol ti panangplastar iti GPS location ti Sand Dunes ditoy siudad tapno saan a sabali ti pagturongan dagiti turista.
Inbatadna a no saraken ti lokasion ti Sand Dunes Laoag, ti agparang ket ti Paoay Sand Dunes isu’t gapuna a no dadduma ket sabali ti pagturturongan dagiti turista.
Gapu iti daytoy, makisaritada iti Department of Information and Communications Technology wenno DICT tapno maplastar a nasayaat ken saan a maiyaw-awan dagiti turista nga umay agpaspasiar ditoy siudad ti Laoag.
Inlawlawagna a ti pannakaplastar ti GPS location ti Laoag Sand Dunes ket tapno maammoan dagiti turista no ania ti kayatda a papanan.
