LAOAG CITY – Binallaagan ti China ti International Criminal Court (ICC) a liklikan ti politicization ken double standards.
Daytoy ket kalpasan ti panangarestar ken ni dati a Presidente Rodrigo Duterte apaman a nakasangpet isuna ditoy pagilian idi kalman, aldaw ti Martes a naggapu idiay Hong Kong no sadinno nga inserbi dagiti pulis ti arrest warrant manipud iti International Criminal Court.
Iti maysa a briefing, inbatad ni Chinese foreign ministry spokeswoman Mao Ning idi nasaludsod isuna mainaig iti panangarestar iti dati a Presidente a naiget ti panagmonitorda iti panagdur-as iti situasion.
Inallukoy ti China ti International Criminal Court nga agiwayat dagiti otoridad a naisaguday iti linteg ken panangipatungpal ti “principle of complementarity” a mangibagbaga a mabalin laeng nga agtignay ti International Criminal Court no dagiti nailian a korte ket saanda a maaramid wenno saanda a kayat ti ag-prosecute kadagiti krimen.
Maipalagip nga idi panawen iti panangidaulo ni Duterte, inlungalongna ti panagpagayamna iti China iti babaen ti asp-asideg a relasion ken kooperasion ti Pilipinas ken China kadagiti nagduduma nga isyu.
