LAOAG CITY – Naarestar ti maysa a karpintero iti insayangkat ti Philippine National Police nga anti-illegal drug buy-bust operation iti ili ti Badoc.
Segun ken ni Police Capt. Ellison Pasamonte, ti chief of police iti ili ti Badoc, ti suspek ket agtawen ti 57, naasawaan, ken residente metlaeng iti nadakamat a barangay.
Kuna na a ti suspek ket newly Identified ken ti rumrumuar a dagiti kangrunaan a laklakoan na ket dagiti menor de edad.
Inbatad ni Pasamonte nga inarestar a dagus dagiti otoridad ti suspek kalpasan a naglako ti maysa a sachet a naglaon ti maipagarop a shabu iti nagpammarang kas poseur-buyer.
Innayon na naala pay iti ikot ti suspek ti uppat a sachet a naglaon metlaeng ti maipagarop a shabu, sangaribo a pisos a nausar iti operasyon, uppat a pedaso ti folded foil a naglaon ti maipagarop a residues, maysa a pedaso ti kaha ti sigarilyo, maysa a lighter, ken maysa a one Hundred Peso bill.
Inpakaammo ti opisyal a mapatta-patta a dagiti nakumpiskar a maipagarop a shabu iti ikot ti suspek ti agdagsen iti maysa a gramo ket agbalor iti P6,800 a pisos.
Kuna na a basar iti panagmonitor da ket iti laeng ili ti Badoc ti pagop-operaran na ngem mabalin nga uray kadagiti kaparanget nga ili.
Iti agdama, nagtalinaed ti suspek iti Philippine National Police iti ili ti Badoc bayat a maisagsagana ti maipila a reklamo kontra kenkuana.
