LAOAG CITY – Inbatad ni Atty. Jason Perera a nawaya-wayaan ti kliyente na a natiliw iti anti-illegal drug buy-bust operation a naisayangkat iti ili ti Bangui idi rabii ti Marso 11 ita a tawen.
Daytoy ket ni Noel Villanueva, agtawen ti 33, residente iti Barangay Lanao iti ili ti Bangui.
Maipalagip a naala iti ikot ni Villanueva ti sumuruk-kumurang a maysa a gramo a naglaon ti maipagarop a shabu nga agbalor iti 6,800 a pisos.
Inlawlawag ni Perera a napaay ti Philippine National Police a nangipila ti kaso a panaglabsing iti Republic Act (RA) 9165 wenno Comprehensive Dangerous Drugs Act of 2002 kontra ken ni Villanueva iti las-od ti 36 nga oras a kas reglementary period.
Segun kenkuana, mamati a naibaybayag ti pannakaipila ti reklamo kontra iti kliyente na gapu ta ado dagiti corrections a napasamak.
Gapu iti daytoy, kuna ni Atty. Perera nga agtennag a regular filing ti kaso ti nasao a suspek.
Kabayatanna, agpapan maisursurat daytoy a damag ket awan pay ti inpaay a komento wenno reaksyon ti Philippine National Police iti ili ti Bangui seknan iti napasamak.
