LAOAG CITY – Inbatad ti Philippine National Police (PNP) a nakasagana a mangasistir iti International Criminal Police Organization (Interpol) no adda pay dagiti possible a warrants of arrest a maiparuk-at kontra kadagiti kaalyado ni dati a Presidente Rodrigo Duterte iti nadara a war on drugs.
Nupay kasta, kuna ni Philippine National Police spokesperson Police Brigadier General Jean Fajardo nga awan pay ti naidanun kenkuana nga impormasyon seknan iti daytoy a banag.
Inlawlawag na a saan da a kayat nga unaan ti proseso ngem inpalagip na nga ammo ti amin a malaksid ken ni dati a Presidente Duterte ket adda pay dagiti kakadwa na a nakasoan mainaig iti naipatungpal a giyera kontra illegal a droga iti napalabas nga administrasyon.
Maipalagip a kalpasan a naarestar ni dati a Presidente Duterte ket adda dagiti rimuar a report a possible nga adda dagiti dadduma a warrant of arrest nga iparuk-at ti International Criminal Court kontra kadagiti sumagmamano pay a personalidad a dakkel ti nagbalin nga akem na iti kampanya seknan iti war on drugs.
