LAOAG CITY – Inpasigurado ti Metropolitan Waterworks and Sewerage System (MWSS) nga awan ti mapasamak a panagkurang iti suplay ti danum para iti intero a 2025 uray asidegen a sumrek ti hot dry season.
Inbatad ni Metropolitan Waterworks and Sewerage System Acting Deputy Administrator Patrick James Dizon, tunggal summer season manipud iti bulan ti Marso agingga iti Mayo ket ngumatngato ti 10% agingga iti 15% ti panagusar ti danum dagiti tattao tapno maikkat ti epekto kadakuada ti nabara a panawen.
Inpasingked pay ni Dizon nga awan ti mapasamak a panagngato iti singir ti danum iti baet a ngumato ti demand iti suplay ita a napudot ti paniempo.
Inallukoyna dagiti umili nga usaren iti umiso ti suplay ti danum nangruna iti panawen ti kalgaw nga awan unay ti panagtudona.
