LAOAG CITY – Mangisayangkat ti Department of Education – Schools Division of Laoag City ti Victory Party kalpasan a nagun-od ti back to back champion iti kaliplippas a 2025 Region 1 Athletic Association Meet.
Segun ken ni Dr. Joann Corpuz, Schools Division Superintendent ti Department of Education – Schools Division of Laoag City, babaen iti daytoy ket marambakan ti panagballigi dagiti atleta ken maipaayan ti pammigbig dagitoy.
Inbatadna nga ita a tawen 2025 ket nakagun-od ti Schools Division of Laoag City ti pakabuklan a 82 a balitok a medalya no sadinno nga ad-adu daytoy maidasig iti napalabas a tawen 2024 a 79.
Inlawlawagna a makapatengngel anges ti panagay-ayam dagiti pambato nga atleta kadagiti baro nga ay-ayam kas ti wrestling, boxing, wushu ken pencak silat a kaaduan kadagitoy ket nakaiyawid ti balitok a medalya.
Kunana a malaksid laeng ti back to back championship trophy ket nakagun-odda pay ti sumagmamano nga special awards kas ti Best Performing Division in Arnis, Best Performing Division in Taekwondo, Best Performing Division in Gymnastics ken Best Performing Division in Wushu.
Innayonna a mangnamnama nga adda manen ti maipaay nga insentibo kadagiti atleta nga ipaay ti lokal a gobierno kas iti napalabas a tawen nga isuda met laeng ti nagkampeon iti naindaklan nga aktibidad.
