LAOAG CITY – Inpasigurado ni Senate President Chiz Escudero a saan a maapektaran ti panangtingiting ti International Criminal Court (ICC) ken ni dati a Presidente Rodrigo Duterte ti iskedyul ti impeachment trial kontra ken ni Vice President Sara Duterte.
Inpetteng ni Escudero nga awan iti linteg a mangibilbilin nga itantan ti impeachment trial gapu ta adda ti maiwaywayat a panangtingiting iti International Criminal Court ken gapu ta adda dagiti tignay protesta.
Naammoan a no bilang adda idiay The Netherlands ni Vice Pres. Sara iti panawen ti trial daytoy iti Senado ket inlawlawag ni Escudero a karebbengan daytoy ti Bise Presidente ken saan met nga obligado a sumango iti impeachment trial ni Vice President Duterte.
Innayon ti Senate President, awan pay iti linteg a mangipawpawil iti Bise Presidente a sumango iti International Criminal Court kas abugado ti amana a dati a Presidente.
Kabayatanna, ti inlungalong a timeline ni Escudero ket inton Hulio 30 a plano a rugian ti panangtingiting ken ni Vice Pres. Duterte a target a malpas inton Oktubre.
