LAOAG CITY – Nakasagana latta ni Senate Majority Floor Leader Francis Tolentino a mangipaay ti tulong legal para ken ni Senador Ronald “Bato” dela Rosa a sumangsango iti pangta ti panangarestar ti International Criminal Court (ICC).
Maipalagip nga immunan a dinakamat idi ni Tolentino nga isuna ti tumakder a legal counsel ni Dela Rosa iti International Criminal Court.
Nupay kasta, rumrummuar a sinuktan isuna ni dati a Presidential Spokesperson Harry Roque kas abugado ti Senador.
Inbatad ni Tolentino, saanda pay a nagsarita ken ni Dela Rosa sipod idi napasamak ti panangarestar ti International Criminal Court ken ni dati a Presidente Rodrigo Duterte.
Kabayatanna, no bilang agkiddaw ni Dela Rosa ti tulong ken ni Tolentino, kuna ti Majority Leader ti Senado a nakalukat ti selponna para iti tawag ni Sen. Bato ken nakasagana a mangipaay ti personal a legal advice-na iti padana nga agpanpanday linteg.
