LAOAG CITY – Nagpalagip ni Atty. Joel Gines, Provincial Election Supervisor kadagiti amin a local candidates ditoy probinsia kagiddan ti umuna nga aldaw a panagkampania dagitoy.
Segun kenkuana, ita nga aldaw ket naan-anayen a nangrugi ti campaign period para kadagiti local candidates no sadinno a pormal met dagitoyen a maikonsiderar kas maysa a kandidato.
Inbatadna a no maipapan kadagiti campaign materials ket naiget a maipatungpal ti 8 ½ by 14 inches a rukod dagitoy ken ti mabalin a kadakkelan ket 4 feet by 8 feet.
Inlawlawagna a mabalin ti 3 feet by 8 feet ti maysa a campaign material ngem nasken a maikkat iti uneg ti 24 nga oras kalpasan ti naiwayat a campaign rally.
Mainaig iti daytoy, inpakaammo ni Atty. Gines a dua laeng ti mabalin a pangikabilan kadagiti campaign materials dagiti maseknan a kandidato, ti private area ken ti common poster area.
Naiget a maipawil ti panangikabil kadagiti campaign materials kadagiti pagadalan, waiting shed, kayo, poste, public building ken dadduma pay.
Innayonna nga ita nga aldaw ket rinugiandan ti pannakaiwayat ti Nationwide Operation Baklas a nagsalungasing iti ipatpatungpalda a pagalagadan.
