LAOAG CITY – Umaboten iti 10 nga indibidual ti naglabsing iti Commission on Elections Gun ban ditoy probinsya sipud nangrugi ti election period idi Enero 12 ita a tawen.
Segun ken ni Pol Maj. Sheryl Guzman, ti pannakangiwat ti Ilocos Norte Police Provincial Office, dagiti naglabsing iti Comelec gun ban ket manipod iti ili ti Solsona, Bacarra San Nicolas, Sarrat ken ditoy ciudad ti Laoag.
Inbatadna a ti nakatiliwan dagitoy ket babaen dagiti inwayat da nga operasyon no sadinno a siyam a paltog ti nakumpiskar dagiti otoridad.
Inlawlawag ni Guzman a kaadwan kadagitoy ket natiliw babaen kadagiti inyuswat da nga anti-illegal drug operation a nakakumpiskaran da ti paltog wenno dagiti bala manipud kadagiti suspek.
Kunana a napilaanen dagiti suspek ti kaso gapu iti panaglabsing da iti Republic Act No. 10591 wenno ti Comprehensive Firearms and Ammunition Regulation Act ken ti COMELEC Resolution No. 11067.
Kabayatanna, inpakaammo ti pannakangiwat ti Ilocos Norte Police Provincial Office nga ad-adda pay a pinaigetan da ti agmonitor kadagiti gun holders ditoy probinsya.
